Amerıkalyq rejısser Rob Raıner men onyń jubaıy, prodıýser Mıshel Sınger Raınerdiń ólimine baılanysty qylmystyq is qozǵaldy. Olardyń 32 jastaǵy uly Nık Raıner ata-anasyn óltirdi degen kúdikpen qamaýǵa alyndy, dep jazady Egemen.kz
Jergilikti sherıftiń tirkeý derekterine sáıkes, Nık Raıner jeksenbi kúni ustalyp, 4 mıllıon dollar kepilmen qamaýda otyr. Quqyq qorǵaý organdary ázirge onyń qamaýǵa alynýyna qatysty ózge málimetterdi jarııalaǵan joq.
Otbasynyń resmı málimdemesine qaraǵanda, Rob Raıner men Mıshel Sınger Raıner Los-Andjelestegi óz úılerinen 14 jeltoqsan, jeksenbi kúni óli kúıinde tabylǵan. Rejısser 78 jasta bolǵan, al jubaıy 68 jasta edi. Quqyq qorǵaý organdaryndaǵy joǵary laýazymdy derekkózder ABC News-ke bergen málimetinde, erli-zaıyptylardyń Brentvýd aýdanyndaǵy úıinde pyshaqtalyp óltirilgenin rastaǵan.
Alǵashynda polısııa ólimniń mán-jaıyn anyqtaý maqsatynda tekseris bastaǵan. Alaıda keıin is qasaqana adam óltirý baby boıynsha tergelip jatyr.
The New York Times jazýynsha, Nık Raıner buǵan deıin esirtkige táýeldiligimen kúreskenin ashyq aıtyp kelgen. Sondaı-aq jasóspirim kezinen bastap belgili bir kezeńderde turaqty baspanasyz ómir súrgeni de aıtylǵan.
Rob Raıner — amerıkalyq akter, rejısser, prodıýser jáne ssenarıst. Ol CBS arnasyndaǵy «Vse v seme» sıtkomyndaǵy Maıkl «Mıthed» Stıvık róli arqyly keńinen tanylyp, osy róli úshin 1974 jáne 1978 jyldary «Emmı» syılyǵyn alǵan. Sondaı-aq «Ýoll-strıt qasqyry» men «Sıetldegi uıqysyz túnder» fılmderinde oınaǵan.
Rob Raınerdiń artynda balalary Djeık, Nık jáne Romı qaldy. Ol sondaı-aq alǵashqy jary Pennı Marshalldyń qyzy, aktrısa Treısı Raınerdi asyrap alǵan.